От заводида ОАВ ходимлари учун пресс тур ташкил этилди ФОТОРЕПОРТАЖ

Мамлакатимизда йилқичилик ва от спортини ривожлантириш, унинг моддий-техник ва озуқа базасини мустаҳкамлаш, мазкур соҳа учун мутахассислар тайёрлаш ва уларнинг малакасини ошириш, хорижий давлатларнинг илғор тажрибаларини ўрганиш орқали наслдор, спорт ва хизмат отларини кўпайтиришга алоҳида эътибор қаратилмоқда. 

«Ўзбегим отлари» от заводи 1992 йилда ташкил этилган бўлиб, майдони 140 гектардан ортиқ. Завод қадимий от зотлари, жумладан, Ахалтака тулпорларини кўпайтириш ва парваришлашга ихтисослаштирилган. 

Тарихий манбаларда келтирилишича, Ахалтака зотли отлар бундан беш минг йил муқаддам пайдо бўлган. У Осиё халқларининг ёзма манбаларида само тулпорлари, арғумоқ, учқур айғирлар, дея таърифланган. Тошбитиклар, қояларда сақланиб қолган суратларнинг гувоҳлик беришича, Ахалтака арғумоқлари қадимда ҳозирги Фарғона водийси, Хоразм вилояти ҳудудларида учраган. Айни пайтда мазкур турнинг катта қисми Туркманистон ҳиссасига тўғри келади.

Бугунги кунда «Ўзбегим отлари» заводида 560 та от парваришланмоқда. Улар орасида Ахалтака зотидан ташқари, инглиз ва араб зотли отлар ҳам бор. От заводи фаолияти билан танишган бир гуруҳ журналистлар, шу ернинг ўзида Тошкент вилояти ҳокими соврини учун ўтказилаётган от пойгаси мусобақасига ҳам гувоҳ бўлишди.

2 ёшдан 8 ёшгача бўлган тулпорлар 1200 метрдан  2400 метргача бўлган масофага от чоптиришди.  Мақсад Ашуров, Алишер Исматуллаев, Нодир Муҳамматуллаев, Ботир Янгибоев, Акмал Исомиддинов, Хусан Исломов, Алексей Александров каби чавандозлар ғолиб ва совриндорлар сафидан жой эгаллади.

Суратлар муаллифи - Алимурод МАМАДАМИНОВ, ўз мухбиримиз