Ўзбек дзюдо афсонаси Ришод Собиров ҳақида!

Ришод Рашидович Собиров 1986 йилнинг 11 сентябрида Бухоро вилоятининг Жондор тумани, Бурбоғи қишлоғида туғилган. Ўзбек дзюдочиси, икки карра жаҳон чемпиони, уч карра Олимпия ўйинлари бронза медали соҳиби.

Дзюдо билан 11 ёшида Рустам Тўраев қўл остида шуғулланишни бошлаган. Халқаро мусобақаларга Фурқат Солиев ва Борис Григорьев каби мураббийлар қўл остида тайёргарлик кўрарди.

Ришод илк халқаро совринини 2006 йилда қўлга киритган. Ўшанда қаҳрамонимиз Тайванда бўлиб ўтган ёшар ўртасидаги Осиё чемпионатида биринчи ўринни эгаллаганди. Орадан бир йил ўтиб эса у катталар ўртасидаги Осиё чемпионатида финалгача етиб борган ва иккинчи ўрин эгасига айланган.

2008 йилда Ўзбекистон чемпионига айланган спортчи мамлакат терма жамоаси таркибидан ҳам жой олади ва Олимпиадага йўлланмани қўлга киритади. Пекинда бўлиб ўтган Олимпия ўйинларида 60 кг гача бўлган вазн тоифасида у бронза медали соҳибига айланган.

2010 йилда эса Ришод Собиров Токиода бўлиб ўтган жаҳон чемпионатида ғолибликни қўлга киритади. Орадан бир йил ўтиб, Парижда ушбу муваффақиятини яна такрорлайди.

2012 йили Лондонда бўлиб ўтган Олимпиадада дзюдочи ярим финалгача етиб борган. Бироқ, якунда яна бронза медали билан кифояланишга мажбур бўлган.

2016 йили Бразилияда бўлиб ўтган Рио Олимпиадасида спортчи яна бронза медалини қўлга киритган ва учта олимпиадада медаль қўлга киритган кам сонли дзюдочилардан бирига айланиб олади.




Совринлари:

Олимпиада: 3 та бронза

Жаҳон чемпионати: 2 та олтин, 1 та бронза

Жаҳон кубоги/Гран-При/Улкан тож: 10 та олтин, 4 та кумуш, 1 та бронза

Осиё чемпионати: 1 та олтин, 1 та кумуш, 2 та бронза

Ёшлар ўртасидаги Осиё чемпионати: 1 та олтин


Таъкидлаб ўтиш лозимки, спортчи Бухоро давлат университетини тамомлаган.



Ҳарбий хизматчи.


Мукофотлари:

Халқаро тоифадаги спорт устаси (2003)

"Ўзбекистон Республикасида хизмат кўрсатган спортчи" фаҳрий унвони (2008)

"Ўзбекистон Республикаси Мустақиллигига 20 йил" эсдалик нишони соҳиби (2011)

"Ўзбекистон ифтиҳори" фаҳрий унвони соҳиби (2012)

"Эл-юрт ҳурмати" ордени соҳиби (2016)



Азиз Тўхтамуродов тайёрлади