Ўзбек жанг санъати. Чирчиқда халқаро семинар ташкил этилди

Хабарингиз бор, миллий спорт туримиз бўлган Ўзбек жанг санъати спорт 2009 йилда ташкил этилган бўлиб, мазкур cпоpт турини янада оммалаштириш, машғулотларни юқори савияда тaшкил этиш, спортчиларнинг тажриба ва маҳоратини ошириш учун зарур шарт-шароит яратиш, малакали мураббийлар ва ҳакамлар тайёрлашга Ўзбек жанг санъати федерацияси томонидан  алоҳида эътибор қаратиб келинади. Шу боис, жорий йилнинг 19-20 сентябрь кунлари Ўзбекистон давлат жисмоний тарбия спорт университетида Ўзбек жанг санъати федерацияси томонидан халқаро амалий- назарий семинар ташкил этилди.

Ўзбек жанг санъати спорт тури бўйича мазкур халқаро мураббийлик ва ҳакамлик семинарида Қозоғистон, Қирғизистон,  Россия ҳамда мамлакатимизнинг барча ҳудудларидан 400 нафарга яқин мураббийлар иштирок этишди. 

Семинарни Ўзбек жанг санъати асосчиси, федерация раиси Пўлат Усмонов ҳамда бошқа мутахассислар олиб боришди.

Икки кун давомида семинар иштирокчилари мутахассислар томонидан Ўзбек жанг санъатининг йўналишларини назарий- амалий жиҳатдан ўрганиб, билим ва тажрибасини оширишди. Якуний назорат-машғулотлари ўтказилгач, иштирокчиларга халқаро ҳакамлик ва мураббийлик сертификатлари топширилди. 

Таъкидлаш жоиз, ушбу семинар ўз маҳоратини ошириш, билимларини янгилаш ва билан тажриба алмашиш имконини берди.  Олинган билим ва кўникмалар мураббийларга ўғил-қизларни машғулотларга жалб этиш орқали янги-янги чемпионларни кашф этишга ва миллий спорт туримиз - Ўзбек жанг санъатини  дунё бўйлаб янада оммалашишига хизмат қилади. 

Илҳом РАҲМОНОВ тайёрлади