Ўзбекистон 7 та медаль билан Осиё чемпионатини умумжамоа ҳисобида 2-ўринда якунлади (+Жадвал)

Уч кун давомида қитъамизнинг 29 давлати дзюдочилари жами 14 (7 та эркаклар, 7 та аёллар) та вазн тоифасида медаллар учун баҳс олиб боришди. Муросасиз кечган кичик жаҳон чемпионатида Ўзбекистон терма жамоаси 2 та олтин, 2 та кумуш, 3 та бронза медалига эга чиқди. Бу натижа эвазига дзюдочиларимиз умумжамоа ҳисобида 2-ўринни эгаллашди. 

Таққослаш учун, ўтган йили Гонконгда ўтган Осиё чемпионатида терма жамоамиз 1 та олтин, 1 та кумуш, 5 та бронза медали билан 5-поғонадан жой олганди. Бу сафарги қитъа чемпионатида ҳам худди ўтган йилда бўлгани сингари Япония терма жамоаси 8 та олтин медаль билан биринчи ўринни банд этди. 

Кучли учликка Корея Республикаси дзюдочилари 2 та олтин, 1 та та кумуш, 3 та бронза билан якун ясашди. Битта ортиқча кумуш медаль бизга 2-ўринни тақдим этди. Хитой Халқ Республикаси ва Баҳрайн давлатлари ҳисобида бир нафардан чемпион бўлди. Жами 13 мамлакат делегациялари ўз юртларига камида 1 та бронза медали билан қайтадиган бўлишди.