Ўзбекистон делегацияси Париж-2024 ёзги Олимпиадаси учун навбатдаги йўлланмани қўлга киритди

Ушбу мундиалда Ўзбекистон вакили Игорь Мялин 10 метр баландликдан сувга сакраш мусобақасида финал босқичига чиқиб, “Париж-2024” олимпия ўйинларининг йўлланмасини ҳам қўлга киритди. Бу ҳақда сув спорти федерацияси матбуот хизмати хабар бермоқда.

"Бугун бўлиб ўтган ярим финал мусобақасида Игорнинг чиқиши 415.80 балл билан баҳоланди ва спортчимиз ҳал қилувчи финал босқичига чиққан 12 нафар спортчи орасида 7-натижага эришди. 

Регламентга кўра, 10 метр баландликдан сувга сакраш мусобақасида финал босқичига чиққан 12 нафар спортчи “Париж-2024” олимпия ўйинларига йўлланмани нақд қилиб қўяди.  

Демак, финал мусобақасида медаллар учун курашни давом эттирадиган ҳамюртимиз Игорь Мялин бир вақтнинг ўзида Олимпия ўйинларига йўлланмани ҳам қўлга киритди. Финал баҳслари бугун кечки дастурдан ўрин олган. 

Ўзбекистон сузиш федерацияси Игорь Мялин ва унинг мураббийларини “Париж-2024” олимпия ўйинларига лицензияни қўлга киритгани билан муборакбод этади", - дейилади хабарда.

Маълумот учун, бу Ўзбекистон делегациясининг Париж-2024 Олимпиадаси учун 18-лицензияси бўлди.

Шунингдек, бу Ўзбекистон учун сувга сакраш баҳсларида Олимпия ўйинларига қўлга киритилган илк лицензия бўлганини таъкидлаш лозим.