Ўзбекистон делегациясининг дастлабки гуруҳи Ханчжоуга жўнаб кетди

Ханчжоу-2022 ёзги Пара Осиё ўйинларида делегациямиз катта таркиб – 11 спорт турида 108 нафар пара атлет билан иштирок этади. “Қитъа Паралимпиадаси”да вакилларимиз пара шахмат, пара каноэ, пара академик эшкак эшиш, пара велоспорт, пара таэквондо ва пара стол тенниси дастурларида дебют қилишади.  

Мусобақа давомида пара ўқ отиш, пара стол тенниси, пара енгил атлетика, пара дзюдо, пара таэквондо, пара пауэрлифтинг, пара велоспорт, пара каноэ, пара академия, пара сузиш дастурларида пара атлетлар медаллар қатори Паралимпия ўйинлари лицензиялари ҳамда рейтинг очколари учун ҳам кураш олиб боришади.  

Ўзбекистон делегациясининг Пара Осиё ўйинлари тарихида энг яхши натижаси 2018 йил Жакарта-Палембанг (Индонезия)да ўтган Ўйинларга тўғри келиб, мамлакатимиз умумжамоа ҳисобида олтинчи ўринни эгаллаганди. Медаллар жамғариш бўйича энг яхши кўрсаткичимиз ҳам 5 йил аввал Индонезияда ўтган III ёзги Пара Осиё ўйинларига тўғри келади. Унда делегациямиз 33 та олтин, 24 та кумуш ва 18 та бронза, жами 75 та медаль жамғарган эди.

Маълумот ўрнида Пара Осиё ўйинларининг тантанали очилиш маросими 22 октябрь куни ўтказилади. Асосий Ўзбекистон спорт делегацияси 20 октябр куни Ханчжоуга йўл олади.