Ўзбекистон дзюдо федерацияси ва Saber брендидан хайрия ФОТОГАЛЕРЕЯ

Бугунги тинч, доруломон, тўкин-сочинлик даврида ҳам саҳоватли халқимиз, ногирон, имконияти чекланган фуқаролар, ота-онасидан етим қолган, меҳрга муҳтож болажонларнинг ҳолидан хабар олиб, беғараз ёрдам кўрсатиб келмоқда. 

Хусусан, Ўзбекистон дзюдо федерацияси ҳам бу каби хайрли ишлардан четда қолаётгани йўқ. Куни кеча федерация мутасаддилари, дзюдочилар Saber бренди билан ҳамкорликда Тошкент вилоятининг Қуйи Чирчиқ туманида жойлашган "Беруний" маҳалласида бўлишди. 

"Беруний" маданият саройида отаси ёки онасини эрта йўқотган, ногирон болажонлар учун байрам тадбири ташкил этилди. Терма жамоа бош мураббийи Илиас Илиадис, Токио Олимпиадаси совриндори Давлат Бобонов, шунингдек, Шарофиддин Болтабоев, Бекмурод Олтибоев, Музаффарбек Тўрабоев жами олтмиш тўрт нафар болага совғалар улашишди. Эртак қаҳрамонлари иштирокидаги саҳна кўринишлари, куй-қўшиқлар болажонларга байрамона кайфият бағишлади.