07 авг 13:02
Янгиликлар

Сув спорти турлари

Ўзбекистон илк бор сёрфинг бўйича Осиё чемпионатида қатнашяпти, унда Пуэрто-Рикодан маҳаллийлаштирилган спортчи юртимиз шарафини ҳимоя қиляпти

Ўзбекистон МОҚ хабар беришича, шу кунларда Ҳиндистоннинг Махабалипурам шаҳрида сёрфинг бўйича Осиё чемпионати ўтказилмоқда.

"19 мамлакатдан 100 нафардан ортиқ спортчи қатнашаётган мазкур мусобақада биринчи бор Ўзбекистон терма жамоаси аъзоси ҳам иштирок этяпти.

Аёллар ўртасидаги беллашувларда юртимиз шарафини 20 ёшли спортчимиз Майя Карл ҳимоя қиляпти. Анъанага мувофиқ, очилиш маросимида мусобақанинг барча иштирокчилари махсус идишни ўз мамлакатларидан олиб келинган қум билан тўлдиришди. Спортчимиз бу тадбирда идишни Орол денгизидан олиб келинган қум билан бойитди", дейилади Ўзбекистон Миллий Олимпия қўмитаси матбуот хизмати тарқатган хабарда.

Маълумот учун, Майя Карл 2005 йилда АҚШнинг Нью-Йорк шаҳрида туғилган. У бунгача Пуэрто-Рико терма жамоаси сафида фаолият юритиб келган.