Ўзбекистон қиличбозлик федерациясида "Очиқ эшиклар куни" бошланди

Бу сафар навбат Ўзбекистон қиличбозлик федерациясига.

Ўзбекистон Республикаси Жисмоний тарбия ва спорт вазирлиги, Ўзбекистон қиличбозлик федерацияси спорт ва оммавий жисмоний тарбия тадбирларининг 2020 йил учун республика календарь режасига мувофиқ, қиличбозлик бўйича Ўзбекистон терма жамоаси учун муносиб ўриндошларни саралаб олиш ва иқтидорли спортчиларни аниқлаш, қиличбозлик спортини янада оммалаштириш  ва ривожлантириш мақсадида, 2020 йил 23-25 декабрь кунлари қиличбозликнинг учта тури (шпага, рапира, сабля) бўйича катталар орасида "Кучлилар турнири" ўтказилинади.

Шунингдек, муҳтарам Президентимиз илгари сураётган жамиятимизда соғлом турмуш тарзини кенг тарғиб қилиш мақсадида Ўзбекистон Миллий олимпия қўмитаси ҳамда Ўзбекистон қиличбозлик федерацияси ҳамкорлигида мазкур турнир доирасида спортга қизиқувчи ёшларни қиличбозлик билан шуғулланишга жалб этиш мақсадида уч кун давомида "Очиқ эшиклар куни" бўлиб ўтади. Тадбир давомида ўзбек қиличбозлик спортининг ёрқин вакиллари иштирокида қизиқарли учрашувлар кўзда тутилган. "Кучлилар турнири" ҳамда "Очиқ эшиклар куни" "Пахтакор" спорт мажмуасидаги қиличбозлик залида соат 10:00да бошланди.

Азиз дўстлар, Ўзбекистон қиличбозлик федерацияси барча қиличбозлик  спорти иҳлосмандаларини ушбу ажойиб тадбирга таклиф этади!