Ўзбекистон терма жамоасининг жаҳон чемпионатлари тарихидаги энг яхши натижасини биласизми?

1-14 май кунлари Тошкентда бокс бўйича катталар ўртасидаги йигирма иккинчи жаҳон чемпионати бўлиб ўтади. Унда иштирок этадиган Ўзбекистон терма жамоаси мазкур мусобақа тарихидаги энг яхши натижасини қайд этиш имкониятига эга.

Мусобақалар тарихига назар ташлайдиган бўлсак, йигитларимиз энг яхши натижасини 2019 йилда қайд этганига гувоҳ бўламиз. Россиянинг Екатеринбург шаҳрида ўтказилган жаҳон чемпионатида вакилларимиз 3 та олтин, битта кумуш ва битта бронза медалини қўлга киритган эди.

Шаҳобиддин Зоиров, Миразизбек Мирзахалилов ва Баҳодир Жалолов ўшанда олтин медалларга эга чиқишган эди. Дилшодбек Рўзметов кумуш, Бобо-Усмон Батуров эса бронза медалларига сазовор бўлганди.

Жами 5 та медални қўлга киритган Ўзбекистон делегацияси 2019 йилги жаҳон биринчилигида умумжамоа ҳисобида биринчи ўринни эгаллаб, ўзининг энг яхши натижасини қайд этганди.

Икки йил ўтиб, Сербияда ўтказилган 2021 йилги жаҳон чемпионатида эса вакилларимиз 2 та медаль билан Ватанга қайтган эди. Абдумалик Халаков кумуш, Мадияр Саидраҳимов эса бронза медалига сазовор бўлганди.