Ўзбекистон ва Туркия ўртасида спорт соҳасидаги ҳамкорлик янада мустаҳкамланади

Дастлаб икки давлат расмийлари ўзаро ҳамкорлик алоқаларини янада мустаҳкамлаш, келгусидаги истиқболли режалар юзасидан музокара олиб боришди. Учрашувда Жисмоний тарбия ва спорт вазирининг биринчи ўринбосари Равшан Эрматов, МОҚ раиси Рустам Шоабдураҳмонов, МОҚ Бош котиби Ойбек Касимов, МОҚ раиси ўринбосари Шерзод Ташматов ҳамда Ўзбекистон камондан отиш федерацияси раиси Отабек Имамов иштирок этди. Шундан сўнг мажлислар залида Ўзбекистон ва Туркия МОҚ ўртасида ўзаро ҳамкорлик меморандумини имзолаш маросими бўлиб ўтди.

Ушбу меморандум терма жамоаларимиз ўртасида қўшма ўқув-машғулот йиғинларини ташкил қилиш, соҳада эришилган ютуқлар, спорт тиббиёти ва фармакологияси бўйича тажриба алмашиш каби йўналишларни ўз ичига олади.

Тадбирнинг кейинги қисмида МОҚ музейида матбуот анжумани бўлиб ўтди. Унда ОАВ ходимлари мазкур меморандум моҳияти, ҳар икки ташкилот ҳамкорлигининг истиқболли режалари ҳақида ўзларини қизиқтирган саволларга жавоб олишди. Анжуман якунида Угур Эрденер МОҚнинг мартабали меҳмонлар китобига ўз дил-изҳорларини ёзиб қолдирди.