23 июл 19:23
Янгиликлар

Бокс/ММА

Ўзбекистон ёшлар терма жамоаси аъзолари онлайн машғулотда иштирок этишди

Теглар : Бокс

Яхши биласиз, Ўзбекистонда яна карантин қоидалари кучайтирилган. Шу сабабли боксчиларимиз ҳам машғулотларни масофавий тарзда ташкил этишмоқда.

Бугун, 23 июль куни Ҳамид Тангрибергенов бошчилигидаги Ўзбекистон ёшлар терма жамоаси аъзолари онлайн машғулот ўтказишди. Ёш боксчиларимиз мураббий кўрсатмаларига амал қилган ҳолда топширилган вазифаларни бажаришди.

Онлайн машғулотни кузатиб борган Ўзбекистон бокс федерацияси бош котиби Муроджон Мамадалиев боксчиларимиз билан мулоқот қилар экан, яқин орада яна йиғинлар бошланишини, унгача эса масофавий тарзда шуғулланишда давом этиш лозимлигини қайд этиб ўтди.

Машғулот якунлангач, мураббий Ҳамид Тангрибергенов йигитларимизга карантин қоидаларига қатъий риоя қилиш лозимлигини, ижтимоий масофага амал қилган ҳолда машғулотларни давом эттириш кераклигини таъкидлади. Терма жамоа аъзоларига олдинда турган режалар тушунтирилди. Пандемия сабаб шу йили ноябрь ойида ўтказилиши лозим бўлган ёшлар ўртасидаги жаҳон чемпионати келаси йил апрель ойига қолдирилган бўлсада, тайёргарлик режа асосида давом этиши қайд этилди. Шунингдек, карантин чоралари бекор қилинганидан сўнг олдинда бир қатор мусобақалар тургани айтиб ўтилди.

Ўзбекистон бокс федерацияси матбуот хизмати