Ўзбекистонда Олимпия кунига катта тайёргарлик кўрилмоқда

Сизга шуни мамнуният билан маълум қиламизки, ўша куни Ўзбекистонда ҳам ушбу санани муносиб нишонлаш режалаштирилган ва бунинг учун айни пайтда катта тайёргарлик ишлари олиб борилмоқда.

Миллий олимпия қўмитаси ушбу тадбирни қай тарзда ташкил этмоқчи? Шу ҳақида қисқача маълумот бериб ўтсак. Режага биноан, куннинг биринчи ярмида анъанавий марафон ва енгил атлетика бўйича мусобақа уюштирилади. Кечки пайт эса «Миллий» (собиқ «Бунёдкор») стадионида бўлиб ўтадиган байрамда спортчилар ва санъаткорлар иштирокида турли кўргазмали чиқишлар ташкил этилади.

Ўша куни Сизни кўплаб кутилмаган совғалар кутиб турибди. Мазкур спорт байрамига 30 000дан ортиқ меҳмон ташриф буюриши кутилмоқда. Стадионда гимнастика, теннис, велоспорт, бокс, қиличбозлик, яккакурашлар ҳамда енгил атлетика усталари ўз маҳоратларини йиғилганларга намойиш этадилар. Тадбирнинг асосий қисмида шоу-бизнес юлдузлари ва ZO’R TV телеканали бошловчилари ўртасидаги футбол ўйини ташкил қилинади. Бир сўз билан айтганда 23 июнь куни Сизни ажойиб спорт байрами кутиб турибди.

Шу куни мамлакатимизнинг энг кўркам ва муҳташам спорт аренасига энг кичик ёшдаги спорт ихлосмандларидан тортиб, фахрийларимиз ҳам ташриф буюришлари мумкин. Тадбирни ташкил этишдан кўзланган асосий мақсад эса ахоли орасида соғлом турмуш тарзини тарғиб қилиш, турли авлод вакилларини жисмоний тарбия ва спортга қизиқтиришдир. Шундай экан, Сиз азизлар учун ташкил қилинадиган ушбу спорт байрамидан бебаҳра қолиб кетманг. Сизни 23 июнь куни «Миллий» стадионида кутиб қоламиз.

Нима учун Халқаро олимпия куни айнан 23 июнь куни нишонланади? Бунинг ўзига яраша тарихи бор. 1894 йилнинг июнида Парижда 12 мамлакат вакиллари иштирокида жисмоний тарбия йўналишида юзага келган муаммолар бўйича халқаро Конгресс ўтказилади. 23 июнь куни эса Олимпия ҳаракати ташаббускори барон Пьер де Кубертен маъруза қилади. Унда Кубертен делегатларни Олимпия ўйинларини замонавий тарзда ташкил қилиш бўйича ишлаб чиқилган режа билан таништиради. Шунингдек, Олимпия ўйинларини қайта тиклаб, уни ҳар тўрт йилда ўтказиш ва мусобақаларга барча халқларни таклиф қилиш ғоясини илгари суради. Конгресс унинг таклифини қабул қилади ва 1894 йил 23 июнь куни Халқаро Олимпия қўмитасига расман асос солинади. Шу муносабат билан Халқаро олимпия куни 23 июнь санасига белгиланган.