Парадзюдо. Саидов - жаҳон чемпиони, яна уч спортчимизда бронза! ФОТО

Жаҳон чемпионатида Ўзбекистон терма жамоаси парадзюдочилари ҳам тўлиқ таркиб билан иштирок этяпти. Кеча мусобақанинг илк куни тўрт нафар ҳамюртимиз ғолиб ва совриндорлар сафидан жой олди. 

-73 кг вазн тоифасида юртимиз спорт шарафини ҳимоя қилган Феруз Саидов барча рақибларини мағлубиятга учратиб, жаҳон чемпионига айланди. Саидов финалга қадар хитойлик Пуги Ву, литвалик Освалдас Барейкис, россиялик Василий Кутуевдан устун келди. Олтин медал учун кечган баҳсда эса кореялик Сёнг Жун Янгни мағлуб этди. 

-66 кг вазн тоифасидаги вакилимиз Ўткиржон Ниғматов бронза медалига сазовор бўлди. Ярим финалга қадар етиб келган ҳамюртимиз озарбайжонлик бўлажак жаҳон чемпиони Байрам Мустафоевга имкониятни бой берди. Бронза медали учун баҳсда эса украиналик Давид Хоравадан устун келди. 

Шунингдек, терма жамоамиз аъзоларидан Шерзод Намозов (60-кг), Парвина Самандарова (-57 кг) бронза медалига сазовор бўлишди. Бугун қолган вазн тоифасидаги дзюдочиларимиз татамига чиқишади.