Парадзюдочиларимиз жаҳон чемпионатини 6 та медаль билан якунладилар

Мусобақанинг биринчи кунида спортчиларимиз томонидан 1 та олтин, 3 та бронза медали қўлга киритлгани ҳақида хабар қилгандик.

Беллашувларнинг иккинчи кунида икки нафар спортчимиз шоҳсупага кўтарилишга муваффақ бўлди. -70 кг вазн тоифасида баҳсларда иштирок этган Васила Алибоева мусобақа давомида Италия, Россия ва Мексика вакилаларини мағлубиятга учратиб, финалгача етиб борди. Ҳал қилувчи жангда бразилиялик рақибасига имкониятни бой берди ва кумуш медалга сазовор бўлди. +100 кг вазн тоифасидаги баҳсларда қатнашган Ширин Шарипов илк жангида грузиялик спортчидан устун келди. Чорак финалда Жанубий Корея терма жамоаси вакилига ютқазиб қўйди. Бронза медали учун кечган жангларда эса Жазоир ва россиялик икки нафар спортчидан устун келди.

Шу тариқа, парадзюдочиларимиз Португалиядаги жаҳон чемпионатини 1 та олтин, 1 та кумуш ва 4 та бронза медали билан якунлашди. Умумжамоа ҳисобида эса 42 мамлакат ичида тўртинчи ўринни эгалладилар.

Миллий олимпия қўмитаси ушбу муваффақият билан спортчиларимиз, мураббийлар ва Ўзбекистон Паралимпия ассоциациясини муборакбод этади.