Порлаши кутилган Артём Вахитов UFC'га ўтмайдиган бўлди, сабаби — пул!

Россия кикбоксининг юлдузи бўлмиш Вахитов ўтган йили Дана Уайт Контентер сериясида жанг қилиб, франциялик Ислем Масрафни биринчи раунддаёқ нокаутга учратган ҳолда UFC билан шартнома имзолаш ҳуқуқига эга бўлганди.

Лекин томонлар келишувга эриша олмади. Бунга UFC'нинг Артёмга таклиф қилган молиявий шароити сабаб бўлди.

"Жамоам савдолашишга ҳаракат қилди, аммо UFC қоидалари бирор бир ҳаракат учун эркинлик бермайди. Бундай ёндашув билан боғлиқ ҳеч қандай шикоятларим йўқ, мен уларнинг қоидаларини ҳурмат қиламан. Аммо мен профессионал жангчиман, оиламни боқишим керак ва менинг вақтим ҳам чекланган... UFC'га кириш жуда қизиқарли бўлар эди, аммо молиявий шароитлар бошқа таклифларга нисбатан жозибали кўринмади, шунинг учун биз хушмуомалалик билан рад этдик. Шундай қилиб, музокаралар ўзаро ҳурмат билан якунланди", деди Вахитов.

Энди Артём 14 июнь куни Glory 100 турнири доирасида оғир вазн чемпиони Рико Верхувен билан жанг қилади.