President's Cup. Фомин ҳам, Султонов ҳам 1/2 финалда!

Қувонарлиси, мусобақада иштирок этаётган ҳар икки теннисчимиз ҳам 1/2 финал йўлланмасини қўлга киритди. Ўзбекистоннинг биринчи ракеткаси Сергей Фомин 1/4 финалда япониялик Масамичи Имамурани ортиқча қийинчиликсиз мағлубиятга учратди - 6/2, 6/1. 

Таққослаш учун, Фомин ATP рейтингида 308, Кунчиқар юрт вакили 422-ўринни эгаллаб турибди. Сергей 56 дақиқалик учрашув давомида 2 та эйс зарбасини амалга ошириб, 1 та қўшхатога йўл қўйди. Масамичи эса аксинча, 1 та эйс ва 2 та қўшхато қайд этди. Бугун турнирда учинчи рақам остида таснифланган Фомин финал чиптаси учун рейтингнинг 629-поғонасида бораётган, тунислик 29 ёшли Азиз Дугазга қарши кортга чиқади.  

Мамлакатимизнинг иккинчи ракеткаси Ҳумоюн Султонов ҳам муваффақиятли одимламоқда. Турнирга захира ўйинчиси сифатида қўшилган вакилимиз 1/4 финалда турнирнинг иккинчи ракеткаси, туркиялик Мерт Алкаяни 7/6(5), 6/3 ҳисобида мағлубиятга учратди. 

ATP рейтингида 513-поғонани эгаллаб турган Султонов дунёнинг 298-ракеткасини ярим финал остонасида мусобақадан чиқариб юборди. Саксон тўрт дақиқа давом этган баҳсда Ҳумоюн 1, Мерт 5 та эйс зарбасини амалга оширди. Қўшхатолар Алкаяда кўпроқ бўлди - 2 га 1. Бу теннисчиларнинг ўзаро ўтказган илк учрашуви бўлди. Бироздан сўнг Султонов финал йўлланмаси учун Ҳаято Мацуокага қарши кортга чиқади. Япониялик теннисчи айни пайтда рейтингнинг 314-поғонасини банд этган.