Prezident Kubogi. Бугун ҳам икки гроссмейстеримиз ўртасидаги дербига гувоҳ бўламиз, Абдусатторов эса ҳинд шахматчисига қарши!

Дунёнинг кўзга кўринган гроссмейстерлари мукофот жамғармаси 75 000 АҚШ долларини ташкил этувчи Prezident Kubogi мусобақаси бош соврини учун баҳс олиб боришяпти. Бугун 7-турнинг биринчи доскасида биринчи рақамли шахматчи Нодирбек Абдусатторов (2777) қора доналарда ҳиндистонлик Пураник Абҳиманю (2682)га қарши ўйнайди. Бугунги учрашув олдидан Нодирбек 4,5 очко билан 6-ўринни эгаллаб турибди. Шунча очкога эга Пураник қўшимча кўрсаткичларга кўра 9-поғонадан жой олган. 

Мусобақада қўшимча кўрсаткичларга кўра яна 1-ўринга кўтарилиб олган Ортиқ Ниғматов (IM, 2447) қора доналарда ҳиндистонлик гроссмейстер Ниҳал Сарин (2676) билан ҳисоб-китоб қилади. Сарин ҳисобида ҳам 5 очко бўлиб, у қўшимча коэфицентларга кўра 4-ўринга жойлашган.  

Бу турда ҳам ҳамюртларимиз иштирокидаги дербига гувоҳ бўламиз. Сўнгги турларни яхши ўтказаётган Шамсиддин Воҳидов (2681) ва Нодирбек Якуббоев (2668) бир-бирларига қарши баҳс олиб боришади. Бу уларнинг ўзаро ўтказадиган 32-учрашуви бўлади. Қизиғи, иккала гроссмейстеримиз ҳам 10 тадан ғалабага эришган. Ўн битта партияда кучлар тенг келган.    

Кеча Нодирбек Абдусатторов билан дуранг ўйнаган Жавоҳир Синдаров (2682) бугун 7-турда ҳиндистонлик Санкалп Гупта (2539)га қарши дона суради. Турнирда иккинчи рақам остида таснифланган эронлик таниқли шахмат Парҳам Мақсудлу яна бир ҳинд шахматчиси Саҳа Нилаш (2458)ни синовдан ўтказади. Парҳам ҳисобида 4,5, Нилашда эса 5 очко бор.