Промоутер: "Шоҳжаҳон Эргашев биринчи ярим ўрта вазннинг энг зўри!"

Айни пайтда Шоҳжаҳон ўзининг 17 январь куни АҚШда ўтказадиган жангига тайёргарлик кўрмоқда. Эргашевнинг промоутери Дмитрий Салита жорий 2020 йилда мижозининг биринчи ярим ўрта вазн тоифасида WBA ва IBF чемпионлик камарлари соҳиби Жош Тейлор билан жангини ташкил этмоқчи. 

"Шахсан мен Эргашевни биринчи ярим ўрта вазн тоифасининг энг яхши боксчиси деб тан оламан", - дея Sky Sports нашрига интервью берди Салита ҳамюртимиз ҳақида. - Шоҳжаҳон Kronk залида тажрибали мураббий Шугар Хилл қўл остида машғулот ўтказиб, яхшигина ўсишга эришди. Унинг маҳорати кундан-кунга ортиб боряпти. У ўтган йилнинг август ойида ажойиб жанг ўтказди. 17 январь кунги жангида эса уни янада кучли бўлганини кўрамиз. Унда нафақат нокаутбоп зарбаси, балки тезлиги ҳам бор. Эргашевнинг Жош Тейлорга қарши жанги мухлисларда катта қизиқиш уйғотади. Мен бу жангни ташкил қилиш учун бор имкониятимни ишга соламан".