Қарши ОПСТТМ ходимлари ва спортчиларининг пойтахтга сафари самарали бўлди

Бу борада марказда  ҳамкорлик ишларига алоҳида эътибор қаратилган. Марказ директори Абдулатиф Раҳимов бошчилигида мутахассислар Фарҳод Саидов, Миржалол Шукуров, Исмат Раупов ҳамда бир гуруҳ  истеъдодли спортчи-ўқувчилар Тошкент шаҳрига ташриф буюриб, Олимпия шаҳарчасида жойлашган Ўзбекистон давлат спорт академиясида бўлишди ва академия фаолияти билан яқиндан танишишди. 

Ташриф доирасида академия ректори Илҳомжон Турсуналиев билан мазкур академияда спортчилар тайёрлаш тизимини такомиллаштириш ва ёш авлоднинг спортга бўлган қизиқишини оширишга қаратилган муҳим ва самимий учрашув бўлиб ўтди. 

Учрашувда томонлар спорт соҳасида ҳамкорликни кенгайтириш, ёш иқтидорларни эрта аниқлаш ва уларни профессионал спортга йўналтириш, Олимпия захирасини мустаҳкамлаш, спорт таълими сифатини ошириш хусусида ўзаро фикр алмашиб, келгусида қўшма лойиҳаларни йўлга қўйиш бўйича ўзаро келишиб олишди. Марказ ходимлари ва спортчи-ўқувчилари Олимпия шаҳарчаси билан яқиндан ташиш мақасадида шаҳарча бўйлаб саёҳат қилишди. 

Шунингдек, Қарши ОПСТТМ ходимлари ва ўқувчилари пойтахтимиздаги Республика олимпия ва паралимпия спорт турларига тайёрлаш марказида ташкил этилган учрашувларда ҳам иштирок этишди. Учрашув давомида спортчиларни тайёрлаш сифатини янада ошириш, ўқув-машғулот жараёнларига замонавий ёндошувларни жорий этиш, тренерлар ўртасида тажриба алмашиш ҳамда спортчиларни қўллаб-қувватлаш масалалари муҳокама қилинди. 

Бундан ташқари, Қарши ОПСТТМ директори Абдулатиф Раҳимов ҳамда Республика ОПСТТМ директори Аброр Мамадалиев иштирокида спорт-ёшлар билан очиқ мулоқот бўлиб ўтди. Учрашув сўнггида ҳар иккала марказ директорлари ўртасида спорт фаолияти равнақи йўлидаги ҳамкорлик меморандуми имзоланди. 

Илҳом РАҲМОНОВ тайёрлади