Қиличбозлар Тошкентдаги «Ғалаба» боғига ташриф буюришди

Машғулотлар жараёни билан бир қаторда қиличбозларнинг бўш вақтини мазмунли ташкил этиш бўйича Ўзбекистон қиличбозлик федерацияси томонидан спортчиларнинг мақсадида маънавий -маърифий, маданий дастур ҳам ишлаб чиқилган. Асосий мақсад ёш қиличбозларимиз қалбида Ватанга, бой тарихимизга, маданиятимизга соғлом муносабатни шакллантириш, ватанпарварлик, миллий урф-одатлари, халқимизнинг шонли ўтмишига ҳурмат руҳида тарбиялашга қаратилган.

28 январь куни қиличбозларимиз Тошкент шаҳрининг Олмазор туманидаги "Ғалаба" боғига ташриф буюришди. Маълумки, "Ғалаба" боғи Ўзбекистон Президенти Шавкат Мирзиёев ташаббуси билан фашизм устидан Буюк Ғалабанинг 75 йиллигига бағишлаб очилган.

Парк экспозициясида музей деворлари ичида жонланиб келаётгандек уруш даври манзаралари, ҳарбий офицерларнинг маникенлари, хандаклар, дубинкалар ва дала ошхоналари, темир йўл вокзали, эски кутубхоналар бўлган жойлар композициялари акс эттирилган.  Шунингдек, музейда уруш йилларидаги ҳарбий қуролларнинг ноёб кўргазмаси мавжуд.

Боғ ҳудудида, очиқ ҳавода, ҳарбий техника ва қурол-яроғ кўргазмаси билан яқиндан танишиш мумкин.

Боғнинг марказий хиёбонига Сталинград жанги пайтида бебаҳо ҳарбий қахрамонлик кўрсатган улкан қўшинни бошқарган ўзбек ўғлони генерал Собир Раҳимов бошчилигидаги уруш қаҳрамонлари ва қатнашчилари ҳайкали ўрнатилган.

 «Ўзбекистон қиличбозлик федерацияси ташаббусига кўра бугун, биз қиличбозлик бўйича кадет-ўсмирлар терма жамоаси билан "Ғалаба" боғи ва музейида бўлдик, — деди Аброр Собиров, қиличбозликнинг рапира тури бўйича миллий терма жамоа мураббийи. - Биз бу ерда гўёки Иккинчи жаҳон уруши дунёсига кириб бордик. Айниқса фронтдаги аскарларнинг ўз яқинларига ёзган хатларини кўриб таъсирландим. Зеро, бизнинг боболаримиз тинч осмон остида яшашимиз учун курашдилар. Уларга катта раҳмат ва барча қиличбозлар номидан чуқур таъзим билдираман».

Ушбу паркка ташриф буюриб, сиз сокин йўлаклар бўйлаб юрар экансиз ажоюб манзарадан баҳра оласиз. Ноёб ёдгорликлар ва гўзал манзаралар туфайли бу ер пойтахтимизда ташриф буюрадиган энг машҳур жойлардан бирига айланмоқда.

Бундан ташқари, ўзбек халқининг Иккинчи Жаҳон уруши фронтларидаги жасорати ва қаҳрамонлиги, шунингдек, фронт учун барча зарур нарсалар билан таъминлаган фронт ортида ишлаганларнинг меҳнат қаҳрамонлиги ҳеч қачон унутилмайди.  Тарихий илдизларимизни билиш ёш авлодни тарбиялаш, маънавий бой, баркамол, жисмонан бақувват шахсни шакллантиришнинг асосидир.

Қиличбозларимиз ушбу экскурсиядан катта ва унутилмас таассуротлар билан қайтишди ҳамда Ўзбекистон қиличбозлик федерациясига ва ушбу тадбирнинг барча ташкилотчиларига ўз миннатдорликларини билдиришди. 

Муборак Якубова