Қиличбозлик. Фарғонада "Олимпия чўққилари" мусобақалари старт олди

Ўзбекистон Республикаси Жисмоний тарбия ва спорт вазирлиги тасарруфидаги Олимпия захиралари коллежларининг тарбияланувчилари орасидан ёш иқтидор эгаларини саралаш, уларнинг маҳоратини ўстириш ва миллий терма жамоаларга муносиб заҳира шакллантиришга хизмат қилувчи "Олимпия чўққилари" Ўзбекистон чемпионатининг қиличбозлик йўналишидаги Республика мусобақаларига Фарғона шаҳри мезбонлик қилмоқда.

Таъкидлаш жоизки, ушбу нуфузли турнирга, фарғоналиклар алоҳида кўтаринки руҳ билан тайёргарлик ишларини олиб боришди. Мазкур мусобақа "CОVID-19 пандемияси даврида ҳудудларда спорт турлаги бўйича машғулотлар, мусобақалар ҳамда ўқув-машғулот йиғинларини ташкил этиш талабларига қатъий риоя этган ҳолда ташкил этилди.

Бугун мазкур турнир доирасида қиличбозликнинг шпага тури бўйича республикамиз вилоятлари ҳамда Қорақалпоғистонлик атлетлар шахсий биринчилик баҳсларида ўзаро куч синашди. Ўз навбатида ушбу мусобақада жам бўлган ёш қиличболаримиз мамлакат биринчилиги учун олиб борилган баҳсларда ўзларининг бор спорт маҳоратларини намоён этишди.

Қизғин ва муросаиз кечган мусобақалар жараёнида қизлар орасида, айниқса Бухоро вилояти ҳамда ўғил болалар орасида Тошкент шаҳри қиличбозлик мактаби шпагачилари тенгсиз эканликларини исботлашди.

"Олимпия чўққилари" мусобақаларининг илк ғолиблари билан танишинг.

Шпага. Қизлар, шахсий биринчилик.

1. Хамидова Азиза - Бухоро

2. Кароматова Фируза - Бухоро

3. Касимова Рада - Тошкент

Шпага. Йигитлар, шахсий биринчилик.

1. Сидиков Мухаммад Юсуф - Тошкент

2. Ғофуров Шахриёр - Тошкент

3. Наимов Сардорбек - Бухоро

Ўзбекистон қиличбозлик федерацияси Матбуот хизмати