Қиличбозлик. Осиё чемпионатининг иккинчи кунида спортчиларимиз қайд этган натижалар

Турнирнинг иккинчи кунида 5 нафар спортчимиз иштирок этиши ҳақида хабар қилгандик.

Шпагачиларимиздан Файзулла Алимов илк жангида австралиялик Жереми Шеллини 15:11 ҳисобида мағлубиятга учратди. Иккинчи давра баҳсида эса япониялик Масару Ямадага 11:15 ҳисобида ютқазиб қўйди.

Роман Александров эса илк жангида Қирғизистон вакили Ҳасан Боудуновга 8:15 ҳисобида имкониятни бой берди.

Яшил йўлакчаларда жангга чиққан Жавоҳирбек Нурматов илк учрашувда моғулистонлик Дулгун Енкитсотни 15:13 ҳисобида мағлуб этди. Иккинчи жангида эса япониялик Сатору Уямага 8:15 ҳисобида ютқазди.

Ишонган спортчиларимиздан бири Олег Соколов аввалига эронлик Муҳаммад Али Кейҳанини 15:11 ҳисобида мағлуб этди. Иккинчи босқич жангида эса у жиддий рақиб, Рио Олимпиадаси чемпиони Парк Санг Йонгни 15:11 ҳисобида мағлуб этди. Чорак финал йўлланмаси учун бўлиб ўтган жангда эса қозоғистонлик Дмитрий Алексанинга 10:15 ҳисобида ютқазиб қўйди.

Рапирачи қизимиз Мадинабону Парпиева илк давра жангида сингапурлик Йсин Лауга қарши ўйинда 5:15 ҳисобида мағлубиятга учради.