Қизиқ! Шерзод Темиров 24 соат ичида иккита ўйинда иштирок этди. Футболчининг ўзи вазиятга изоҳ берди

Ҳозирги кунда Ироқнинг "Ербил" клуби сафида тўп тепаётган ҳамюртимиз 24 соат ичида икки учрашувда иштирок этди ва ўзига натижага эришди. Дастлаб, 30-март санасида Тошкентда ўтказилган FIFA Series мусобақаси доирасидаги Ўзбекистон - Венесуэла (0:0) учрашувининг 90-дақиқасида Элдор Шомуродов ўрнига майдонга тушиб, пенальтилар сериясида ўз зарбасидан унумли фойдаланди. Орадан бир кун ўтиб, Шерзод Темиров Ироқ Юлдузлар Лигасининг 25-туридан ўрин олган "Ербил" - "Ал Завраа" баҳсининг танаффусида Кристофер Жон Повейнинг ўрнига майдонга туширилди ва 45 дақиқа давомида майдонда ҳаракатланди. Шундай қилиб, Темиров 24 соат давомида икки баҳсда иштирок этишга улгурди. 

"Клубдагилар "Ал Завраа"га қарши учрашувда жамоага ёрдам беришимни сўрашди. Гарчи осон бўлмаган бўлса ҳам, клуб ихтиёрига етиб кела олдим. Туркия орқали учдим. Жамоам мағлубиятга учрамади. Жамоага ёрдам бера олганимдан хурсандман. Ҳаётда осон нарсанинг ўзи йўқ. Хоҳиш бўлса барчасини уддаласа бўлади", - дея изоҳ берди Шерзод Темиров.

Эслатиб ўтамиз, Темиров жорий мавсумида Ироқ Юлдузлар Лигасида 20та гол билан тўпурарлар рўйхатида етакчи бўлиб турибди.