Қозоғистон Миллий олимпия қўмитаси вакиллари Тошкентда меҳмон бўлишди

Меҳмонларни Ўзбекистон МОҚ биринчи вице-президенти Ойбек Касимов ҳамда бош котиб Жасур Матчановлар кутиб олишди. Ташрифдан кўзланган асосий мақсад Миллий олимпия қўмитаси ҳузурида фаолият юритаётган Республика спорт тиббиёти илмий-амалий маркази фаолияти билан яқиндан танишиш, керак бўлса ундан андоза олиш ва Қозоғистонда ҳам ана шундай марказ ташкил этишни муҳокама қилишдан иборат эди. Тиббиёт марказини кўздан кечирар экан, Қозоғистон МОҚ бош котиби ҳаяжонини яшира олмади. 

"Ўзбекистон МОҚ қошида фаолият юритаётган Республика спорт тиббиёти илмий-амалий маркази менда жуда катта таассурот қолдирди. Бундай спорт тиббиёт мажмуаси Марказий Осиёда ягона эканлиги аҳамиятлидир. Биз ҳам Қозоғистонда спорт тиббиёти бўйича ана шундай марказ ташкил қилишни истаймиз ва бу борада Ўзбекистон МОҚ билан яқин ҳамкорлик ўрнатиш истагидамиз", - деди Данияр Абулгазин.

Шунингдек, учрашув давомида қишки Олимпия ўйинларига кўрилган тайёргарлик бўйича фикр алмашилди. Ўз навбатида, Қозоғистон МОҚ бош котиби қишки спорт турлари бўйича терма жамоаларимизнинг ўқув-машғулот йиғинларини Қозоғистоннинг тоғли худудларида ҳамкорликда ташкил қилиш таклифи билан чиқди.