Қозоғистон қишки Олимпиададаги илк медалини қўлга киритди ва бу олтин медаль!

Фигурали учишнинг эркаклар ўртасидаги беллашувларида иштирок этган Қозоғистон терма жамоаси аъзоси Михаил Шайдоров қисқа ва эркин дастур якунига кўра, жами 291,58 балл тўплади. 

Бу орқали спортчи ўзининг шахсий рекордини янгилади. У якуний жадвалда биринчи ўринни эгаллаб, Қозоғистон ҳисобига 2018 йилдан буён илк Қишки Олимпия ўйинлари медалини келтирди.

21 ёшли Шайдоров 1994 йил Лиллеҳаммерда ғолиб чиққан чанғичи Владимир Смирновдан кейин мамлакатнинг иккинчи Олимпия чемпиони бўлди. 

Мазкур мусобақада япониялик Юма Кагияма кумуш медални қўлга киритди (280.06). Унинг ватандоши Шун Сато эса учинчи бўлди (274.90).

Қисқа дастурдан кейин пешқадамлик қилган АҚШ вакили Илия Малинин эркин дастурда бир нечта хатоларга йўл қўйди. Натижада, сўнгги икки ЖЧ ғолиби саккизинчи ўринга тушиб кетди (264.49).