03 июл 07:21
Янгиликлар
Қозоғистон терма жамоасининг Токио Олимпиадасидаги байроқдорлари маълум + ФОТО
Эътиборлиси, Қозоғистон тарихида илк бор тўрт йилликнинг энг нуфузли мусобақаси тантанали очилиш маросимида одатдагидек бир эмас, икки нафар спортчи мамлакат байроғини кўтариш бахтига муяссар бўлади.
Қозоғистон давлат байроғи бокс бўйича мамлакат терма жамоаси сардори, Баҳодир Жалоловнинг асосий рақибларидан бири Камшибек Кункабаев ҳамда енгил атлетика бўйича Олимпиада чемпиони ва совриндори Ольга Рипаковага ишониб топширилди.
Бу Ольга Рипакова учун фаолиятидаги тўртинчи Олимпиада бўлади. У Лондон-2012 Олимпиадасида олтин медални қўлга киритган. 2008 йил Пекин Олимпиадасида учхатлаб сакраш баҳсларида кумуш, Рио-2016 олимпия ўйинларида эса бронза медалига эга чиққан.
Камшибек Кункабаев – бокс бўйича Қозоғистон терма жамоаси сардори. У ҳарбийлар ўртасида 2014 йилги жаҳон чемпиони чемпиони, 2017 ва 2019 йилларда ўтказилган Осиё ва жаҳон чемпионатларининг кумуш медали совриндори ҳисобланади. Ҳар икки мусобақанинг финалида ҳамюртимиз Баҳодир Жалоловга ютқазган. Қизилўрдалик 29 яшар боксчи илк бор Олимпиадада иштирок этади.
Эслатиб ўтамиз, Токио-2020 Олимпиадасининг тантанали очилиш маросими 23 июль куни бўлиб ўтади. Қозоғистон терма жамоаси 16 июль куни Кунчиқар юртга жўнаб кетади ва икки ҳафталик карантинда бўлади. Спортчиларнинг саломатлиги ва хавфсизлигини таъминлаш мақсадида делегация «Air Astana» компаниясининг чартер рейси билан Токиога йўл олади.
Фикрлар