20 июн 15:29
Янгиликлар

Футбол

Қозоғистонлик депутат: "Қозоғистон ўз камчиликлари устида ишлаши ва бошқаларнинг муваффақиятидан сабаб изламаслиги керак"

Қозоғистонлик сиёсатчи, парламент депутати, "Республика" фракцияси раҳбари Айдарбек Хўжаназаров Sports24.kz порталига берган интервьюсида Ўзбекистон миллий терма жамоасининг Жаҳон чемпионати финал босқичига чиққани ҳақида гапирди.

"Қозоғистон ўз камчиликлари устида ишлаши ва бошқаларнинг муваффақиятидан сабаб изламаслиги керак. Кўпинча "Ўзбекистон чиқди, нега биз бунга эриша олмадик?", дейишади.
Бир неча йил аввал атиги 500 минг киши истиқомат қиладиган Исландия Европа чемпионатига йўлланма олганини эслайлик. Бизда битта туманда бутун Исландиядагидан кўпроқ одам яшайди. Бизда об-ҳаво ҳам уларникидан яхшироқ. Бироқ натижа йўқ. Кимгадир қарашдан фойда йўқ", – деди Хўжаназаров.

Аввалроқ Қозоғистон президенти Қосим-Жўмарт Тўқаев Остона шаҳрида ўтказилган "Марказий Осиё — Хитой" саммити доирасида иштирокчи давлатлар раҳбарлари номидан Ўзбекистон Республикаси президенти Шавкат Мирзиёевни Ўзбекистон терма жамоасининг Жаҳон чемпионатига йўл олгани билан табриклаган эди.