Қозоғистонлик спортчиларга бериладиган мукофот пуллари эълон қилинди

24.kz хабарига кўра, Олимпиада чемпиони бўлган спортчи 250 минг доллар мукофот пулига эга бўлади. Бу ҳали ҳаммаси эмас. Олтин медал соҳибларига пул мукофотига қўшимча тарзда 3 хонали квартира ҳам совға қилинади.

Бу маълумотни давлат телеканалига берган интервьюсида Қозоғистон спорт ва жисмоний тарбия қўмитаси раисининг биринчи ўринбосари Серик Жарасбаев ошкор қилди. Олимпиаданинг кумуш медал соҳибларига 150 минг доллар ҳамда 2 хонали квартира ваъда қилинди. Бронза медал совриндорлари эса 75 минг доллар ва бир хонали квартирага эга бўлишади.

Маълумот учун, 2012 йили Лондонда бўлиб ўтган Ёзги олимпия ўйинларида ҳам худди шу тартибда пул мукофотлари тақдим этилганди. Бу сумма Марказий Осиё давлатлари орасида энг кўпи ҳисобланади. Таққослаш учун, Ўзбекистон спорт делегацияси таркибида чемпион бўлган спортчиларимиз 200 минг доллар мукофот пулига эга бўлишади.

Рио-де-Жанейрода ўтказиладиган Олимпиадада Қозоғистон спорт делегацияси таркибида 104 нафар спортчи 26та спорт турида медаллар учун баҳсларга киришади. 5-21 август кунлари оралиғида ўтказиладиган олимпия ўйинлари дастуридан 28та спорт тури ўрин олган бўлиб, спортчилар 306та медаллар жамланмаси учун баҳсларга киришишади.