Queen's Club. Саралаш орқали асосий тўрга чиққан 37 ёшли Мария мусобақа чемпиони!

Мусобақа бош соврини 37 ёшли Татьяна Марияга насиб қилди. WTA рейтингида 86-поғонада борган германиялик тажрибали теннисчи ҳал қилувчи финал учрашувида дунёнинг 15-ракеткаси, америкалик Аманда Анисимовани мағлубиятга учратди - 6/3, 6/4.

Теннисчиларнинг ўзаро учрашувларида Татьяна иккинчи бор ҳам зафар қучди - 2:0. Саксон уч дақиқа давом этган баҳсда Мария 7, Аманда 4 та эйс зарбасини амалга оширган. Иккала теннисчи ҳам 1 тадан қўшхатога йўл қўйди. Брейклар бўйича устунлик табиийки, чемпион томонида бўлди - 4 га 2. 

Қизиғи, Мария Лондон турниридаги иштирокини квалификация, яъни саралаш босқичидан бошлаб, асосий тўрга йўлланма олган эди. Асосий тўрда кетма-кет Топ-30 рейтингида бораётган 5 нафар рақибасини мағлуб этди. 

Олмон теннисчиси муваффақиятли иштирокидан 500 рейтинг очкоси ва 218,000 доллар мукофот пули ишлаб олди. У янгиланган рейтингда Топ-50`га қайтади. Анисимова эса 325 очко ҳамда 134,260 АҚШ долларига эга бўлди.