Қуролли босқинчилар Роберто Баджонинг уйига бостириб киришди

Футболчининг Альтавилла-Вичентинадаги уйига ҳужум 20 июнь куни кечқурун содир бўлди. Ўшан маҳал оила Евро-2024 доирасидаги Италия ва Испания терма жамоалари ўртасидаги ўйинни (0:1) томоша қилаётган эди. Жиноятчилар Баджо ва унинг оиласини уйдаги хоналардан бирига қамаб, бир соатча ушлаб туришган. 57 ёшли футболчи ҳужумчиларга қаршилик кўрсатишга уринган, бироқ унинг бошига тўппонча билан зарба берилган. Натижада у кўп қон йўқотган.

Босқинчилар бутун уйни ағдар-тўнтар қилиб, соатлар, тақинчоқлар ва пулларни ўғирлаб кетишган. Зарарнинг аниқ миқдори ҳали ҳисоблаб чиқилмаган.

Баджо жиноятчилар кетганини пайқагач, эшикни бузган ва полицияни чақирган. Ҳуқуқ-тартибот идоралари ходимлари жабрланувчилардан кўрсатмалар олиб, видеокузатув камераларини кўриб чиқишмоқда.

Воқеадан сўнг Баджо касалхонага ётқизилган ва унга бир нечта чок тушган. Оиланинг бошқа аъзолари жабрланмаган.

Роберто Баджо 1993 йилда "Олтин тўп"ни қўлга киритган. "Ювентус" билан УEФА Кубоги, чемпионлик ва Италия Кубогига эришган. Италия терма жамоаси таркибида футболчи 1994 ва 1990 йилларда мос равишда Жаҳон чемпионатларида кумуш ва бронза медалларини қўлга киритган.