Рамазон Темиров: "Дуо қилиб туринглар!" + ФОТО

Ҳамюртимиз 24 октябрь куни Бирлашган Араб Амирликлари пойтахти Абу-Даби шаҳридаги "Этиҳад Арена"да ташкил этиладиган рақамли UFC 333 турнирида октагонга чиқади. Темировга англиялик Лоне Кавана рақиб бўлади.

Ҳозирда Кавана ушбу дивизион рейтингида олтинчи, Темиров эса еттинчи ўринни эгаллаб турибди.

"Алҳамдулиллаҳ, халқим, тарих яратишимиз учун яна бир қадам. Инша Аллоҳ, дуо қилиб туринглар", дея ўзининг ижтимоий тармоқдаги саҳифасида UFC матбуот хизмати томонидан эълон қилинган хабарга муносабатини ёзиб қолдирган Темиров. 

Эслатиб ўтамиз, Рамазон сўнгги жангини ҳам айнан Абу-Даби шаҳрида ўтказганди. 25 июль куни бўлиб ўтган турнирда у австралиялик Стив Эрцегни биринчи раунддаёқ техник нокаут эвазига таслим этганди. Ўша жангдан кейин ҳамюртимиз кейинги рақиби сифатида айнан ўзи сингари "стойка"да жанг ўтказадиган Лоне Каванани кўришни хоҳлаётганини айтганди.