Расман: Бобоусмон Батуровнинг навбатдаги рақиби ва жанг санаси маълум бўлди

Ўзбекистонлик 28 ёшли боксчи, ҳаваскорлар ўртасида Осиё чемпиони (2019, 2021), Жаҳон чемпионати бронза медали соҳиби (2019) Бобоусмон Батуров (1-0) проф рингдаги иккинчи жангини қачон ва кимга қарши ўтказиши маълум бўлди.

Унга кўра, ҳамюртимиз навбатдаги жангини ҳам RCC Boxing турнирида ўтказади. 6 май куни Россиянинг Екатеринбург шаҳрида ўтказиладиган бокс оқшомида Батуровга мезбон юрт вакили — Магомеднури Магомедов (1-0) рақиблик қилади. Мазкур жанг 8 раунд этиб белгиланган.

Маълумот учун, мазкур турнирнинг марказий жанги россиялик Магомед Қурбонов (24-0) ҳамда франциялик Мишель Соро (35-3-2) ўртасида кечади. Хабарингиз бор, Мишель Соро ўзбекистонлик Исроил Мадримовга қарши икки бор рингга чиқиб, бир маротаба мағлуб бўлган ва иккинчи жангда дурангга эришган.

Эслатиб ўтамиз, Бобоусмон Батуров профессионал боксдаги дебют жангида россиялик Артём Пугачга қарши рингга чиқиб, ғалаба қозонган эди.