Расман. UFC 300 турнири учун "фахрий"лар жанги эълон қилинди (Постер)

Бугун тонгда мусобақанинг навбатдаги жанглари эълон қилинди.

Улардан бири, енгил вазн тоифасида UFC'нинг фахрий жангчилари - Бобби Грин ва Жим Миллер тўқнашувидир. Улар ўртасидаги жанг прелим кард доирасида 3 раунд этиб белгиланган.

Қизиғи, бу улар ўртасида жанг ташкил қилиш учун тўртинчи уринишдир. Аммо UFC 300 турниридаги жанг улар учун ўзаро илк жанг бўлади.

Бундан ташқари, Миллернинг UFC 100 ва UFC 200 турнирларида ҳам жанг қилганини таъкидлаш лозим. 

Эслатиб ўтамиз, 37 ёшли Бобби Грин UFC'да 24 та жанг ўтказиб, 12 та ғалаба, 10 та мағлубият ва 1 та дуранг қайд этган, яна бир жанги эса ўтказилмаган, деб топилган. У сўнгги жангини 2023 йил декабрь ойида Жалин Тёрнерга қарши ўтказиб, мағлуб бўлган эди.

40 ёшли Жим Миллер эса UFC'да 43 та жанг ўтказган ва 26 та ғалаба, 16 та мағлубият қайд этган. Унинг ҳам бир жанги ўтказилмаган, деб топилган. Миллер ўзининг охирги жангини 14 январь куни Габриель Бенитесга қарши ўтказиб, муддатидан олдин ғалаба қозонган эди.