Расмийлар МОҚнинг ҳудудий вакиллари билан устувор режаларни муҳокама қилишди

Спорт вазирлиги ва МОҚ раҳбарияти Республикамизнинг барча маъмурий ҳудудларидан келган вакиллар билан учрашди.

Учрашувда ҳудудларда Олимпия ҳаракатини ривожлантиришга доир устувор вазифалар, уларнинг ижроси ва инфратузилмавий муаммолар муҳокама қилинди. Самимий муҳитда ўтган мулоқот давомида ҳар бир вакил ўз ҳудудида спорт инфратузилмасининг бугунги ҳолати, ўз олдига қўйган режа ва мақсадлари ҳақида гапириб ўтди.

МОҚ раисининг биринчи ўринбосари Отабек Умаров ҳудудлар фаолиятини кучайтиришда Хитой каби етакчи спорт давлатларининг тажрибасини ўрганиш, шу билан бирга, иқтидорли ёшларга ўз қобилиятларини намоён этиш учун имконият яратиш каби йўналишлардаги таклифларни илгари сурди.

Тадбир давомида ҳар бир ҳудудий бўлимнинг ишини самарали ташкил этиш, муаммо ва камчиликларни чуқур таҳлил қилиш, шунингдек, уларни бартараф этиш механизмларини ишлаб чиқиш лозимлиги таъкидланди.