Равшан Дастиров IBWA вице-президентлигига сайланди

Ушбу нуфузли мусобақада полвонларимиз томонидан битта олтин, бешта кумуш ва олтита бронза медаллари қўлга киритилди. Мазкур жаҳон чемпионати доирасида халқаро белбоғли кураш (борьба на поясах, IBWA) федерациясининг навбатдаги ҳисобот-сайлов Конгресси ҳам ўтказилди.

Конгрессда халқаро федерация президенти, вице-президенти, спорт директори ҳамда  ҳакамлар ҳайъати раислигига номзодлар кўрсатилди. Унда Ўзбекистон миллий белбоғли кураш федерацияси раиси Равшан Дастировнинг номзоди халқаро белбоғли кураш (IBWA) федерацияси вице-президентлигига кўрсатилди. Делегатлар бир овоздан Равшан Дастиров номзодини қўллаб-қувватлашди. 

Шу тариқа Р. Дастиров IBWA вице-президенти лавозимига сайланди.  Конгрессда келаси йили сентябрь ойида белбоғли кураш бўйича 17-20 ёшли спортчилар ўртасидаги жаҳон чемпионати Хоразм вилоятида ўтказилиши халқаро федерация (IBWA)нинг йилик тақвим-режасига киритилди. 

Ушбу Конгрессда шунингдек, Хоразм вилояти жисмоний тарбия ва спорт бошқармаси бошлиғи Шокир Мадаминов ҳам иштирок этиб, Хоразм вилоятида ҳам спортга, хусусан белбоғли курашга кенг имконият ва шароитлар яратилгани, Осиё ва жаҳон чемпионатлари, олимпия ўйинлари совриндорлари бўй кўрсатаётгани ва туризм соҳасида юқори даражадаги ижобий ишлар амалга оширилаётгани ҳақида таъкидлаб ўтди. Конгресс якунида миллий кўринишдаги эсдалик совғалари улашилди.

Илҳом РАҲМОНОВ тайёрлади, ўз мухбиримиз