Разамбек Жамаловнинг устози Ўзбекистон эркин кураш терма жамоаси бош мураббийи бўлди

Хасавюртлик 52 ёшли мутахассис Муса Сайдулбаталов эркин курашчиларимизни навбатдаги мусобақаларга тайёрлайди. Тез орада старт оладиган жаҳон чемпионатида иштирок этмайдиган терма жамоамиз учун бу йилги мусобақалар деярли якунланган. Сайдулбаталовнинг қачон бош мураббий сифатида таништирилиши ва унинг бошчилигидаги илк мусобақа қачон бўлиши бизга ҳали маълум эмас. 

Хабарларга қараганда, Муса Сайдулбаталовга терма жамоамизнинг шу кунгача бош мураббийи бўлган Олим Ҳикматов ёрдам беради. Сайдулбаталов спортчилик фаолиятида Украина чемпиони бўлган. Европа чемпионати иштирокчиси. Эркин кураш афсоналаридан бири Бувайсар Сайтиевнинг Ҳасавюртдаги мактабида мураббийлик қилиб келмоқда. 

Париж-2024 Олимпиадаси чемпиони Разамбек Жамалов Бувайсар ва Адам Сайтиев ҳамда Муса Сайдулбаталов мураббийлигида машғулотларни ўтказиб келади. Сайдулбаталов Разамбекдан ташқари Абубакар Муталиев, Адлан Батаев, Муслим ва Муса Мехтиханов, Умар Муталиев, Имран Хамидов, Хамзат Болатов, Арби Абакаров сингари курашчиларнинг устози ҳисобланади. 

Эслатиб ўтамиз, бир муддат аввал Рустам Ассакалов юнон-рум кураши бўйича Ўзбекистон терма жамоаси бош мураббийи этиб тайинланган эди. Ассакалов Париж-2024 Олимпиадасидан кейин спортчилик фаолиятини якунлаганди.