Разамбек Жамалов ва Ғуломжон Абдуллаев чемпион, яна икки эркин курашчимиз ҳам шоҳсупада (ФОТО)

Анъанавий тарзда ўтказиб келинаётган мусобақада Ўзбекистон терма жамоаси курашчилари ҳам ғолиблик йўлида гиламга чиқмоқда. Қувонарлиси, икки вакилимиз - Париж-2024 Олимпиадаси ғолиби Разамбек Жамалов ҳамда шу Олимпия ўйинларининг бронза медали совриндори Ғуломжон Абдуллаев рақибларини мағлуб этиб, мусобақа чемпионига айланди. 

61 кг вазнда курашган Ғуломжон Абдуллаев ҳал қилувчи финал беллашувида қозоғистонлик Аллан Оралбекни, 74 кг вазндаги Разамбек Жамалов эронлик Али Карампурни мағлубиятга учратди. 

Шаҳзодбек Ярашев (70 кг) финал баҳсида молдовалик Василе Диаконга имкониятни бой бериб, кумуш медалга эга чиқди. Асадбек Саидтўраев (57 кг) бронза медалига сазовор бўлди. Чемпионлар 1000, кумуш медаль соҳиблари 750, бронза медаль эгалари эса 500 евро мукофот пулини қўлга киритди. 

Икки кунлик беллашувлар якунига кўра, Ўзбекистон эркин кураш терма жамоаси 2 та олтин, 1 та кумуш, 1 та бронза медали билан умумжамоа ҳисобида 3-ўринни эгаллаб турибди. Туркия 4 та олтин 1 та кумуш, 14 та бронза медали билан биринчи ўринни банд этган. Эронлик курашчилар 2 та олтин, 4 та кумуш, 5 та бронза медали билан 2-поғонада боришмоқда.