RCC Гран-приси 1/2 финалига чиққан Лазизбек Фаттоев рус матбуотига интервью берди

У 21 март куни Екатеринбург шаҳрида ташкил этилган РМК Яккакурашлар академиясида бўлиб ўтган RCC енгил вазн тоифаси Гран-присининг чорак финали доирасида Чаян Ланзи устидан қозонган ишончли ғалабасига изоҳ берди.

— Лазизбек, ўтказилган жанг қандай таассурот қолдирди?

— Жанг жуда яхши ўтди. Рақиб профессионал боксда дебютант бўлишига қарамай, унинг Олимпиададаги тажрибаси сезилиб турарди. Рингда у темпни яхши ушлаб турди, лекин мен мураббийимни диққат билан тингладим ва ҳаммаси режадагидек ўтди.

— Кейинги 1/2 финал сеткасида кимни асосий рақобатчи деб ҳисоблайсиз?

— Шукрат Саломатов ва Мурод Алиев ўртасидаги жангда томоша бўлишини кутгандим ва бу содир бўлди. Шукратни боксчи сифатида яхши биламан, у билан жанг қилганман. У яхши, бақувват спортчи. Саломатов ғалаба учун қўлидан келганича ҳаракат қилди ва Алиевни ишонч билан енгди. У ҳар доим ўз жангларига яхши тайёргарлик кўради, ажойиб формада ва ҳар қандай боксчи учун жиддий рақиб. Уни биринчи марта Михаил Григорян билан кўрганман, у ерда ҳам аъло даражани кўрсатганди. У ва Вилдан Минасов билан - энг рақобатли жанглар бўлади деб ўйлайман. Аммо тўғри тайёргарлик кўрилса, режимга риоя қилинса, ҳар қандай рақибни енгиш мумкин. Шу боис фақат ғалаба учун интиламан. 

Эслатиб ўтамиз, Фаттоев 6 раунд якунига кўра, ҳакамларнинг якдил қарори билан Ланзи устидан ғалаба қозонганди. Гран-прининг ярим финал босқичига Фаттоҳовдан ташқари Вилдан Минасов, Шукрат Саломатов ва Тигран Согоян йўл олди.