"Реал"да масхарабозлик: Клуб шифокорлари юлдузларни бепул ChatGPT орқали "даволашган"!

Клубнинг собиқ нутрициологи Ициар Гонсалеснинг айтишича, "Қироллик клуби" шифокорлари профессионал тавсияларни четга суриб, сунъий интеллект маслаҳатларига таянишган.

Гонсалеснинг таъкидлашича, шифокорлар футболчиларга қандай қўшимчалар (витаминлар) бериш кераклигини аниқлаш учун ChatGPT'нинг текин версиясидан фойдаланишган. "Улар менга овқатланишнинг аҳамияти йўқлигини айтишди ва ишимга паст назар билан қарашди", — дейди мутахассис.

Бу айбловлар клубдаги тизимли инқироз фонида янграмоқда. Эслатиб ўтамиз, аввалроқ тиббий штаб Мбаппенинг жароҳатланган чап тиззаси қолиб, соғлом ўнг тиззасини текширгани маълум бўлган эди. Шунингдек, Гонсалес штабдаги муҳитни "диктатура" деб атади.

Ҳозирда нутрициолог ўз репутациясини ҳимоя қилиш учун "Реал"ни судга берган. Флорентино Перес эса ушбу воқеалардан сўнг тиббий хизматда катта ислоҳотлар ўтказишни режалаштирмоқда.