12 май 16:01
Янгиликлар

Теннис

Рим "Мастерс". Циципас Штруффни енгиш учун 2,5 соат вақт сарфлади

Дунёнинг саккизинчи ракеткаси Стефанос Циципас Рим "Мастерс" турнирининг учинчи даврасига йўл олди.

Грециялик теннисчи иккинчи даврада ATP рейтингида 41-поғонада бораётган германиялик Ян-Леннард Штруффни иродали тарзда мағлубиятга учратди - 6/7(1), 6/4, 6/4. Теннисчиларнинг ўзаро учрашувларида Стефанос олдинда бормоқда - 5:3.

Икки соату 33 дақиқа давом этган баҳсда Циципас 5, Штруфф 9 та эйс зарбасини амалга оширган. Иккала теннисчи ҳам бир хилда 4 тадан қўшхатога йўл қўйишди. Брейклар ғолиб теннисчида кўпроқ бўлди - 5 га 3.

Энди Циципас Internazionali BNL d'Italia турнирининг учинчи босқичида Кэмерон Норрига қарши кортга чиқади. Ўз ўрнида британиялик ракетка устаси иккинчи даврада испаниялик Хауме Муньярни 6/3, 1/6, 6/3 ҳисобида енгди.