Rio Open. Баес чемпионлик унвонини ҳимоя қилди

Мусобақанинг ҳал қилувчи финал баҳсида дунёнинг 31-ракеткаси бўлиб келган аргентиналик Себастьян Баес ATP рейтингида 60-поғонадан жой олган франциялик Александр Мюллерга қарши кортга чиқди ва 6/2, 6/3 ҳисобида ғалаба қозонди. Бу билан Баес ўз чемпионлик унвонини муносиб тарзда ҳимоя қилди. Ўтган йили ҳам айнан у турнирда бош соврин соҳибига айланганди. 

Бу теннисчиларнинг ўзаро ўтказган илк учрашуви бўлди. Саксон етти дақиқа давом этган финал баҳсида Баес 3, Мюллер 2 та эйс зарбасини амалга оширди. Бу Себастьяннинг фаолиятидаги еттинчи ATP соврини бўлди. Риодаги муваффақиятли иштирок унга 500 рейтинг очкоси ҳамда 448,090 АҚШ доллари миқдоридаги мукофот пулини келтирди. Мюллер эса бир ҳафталик меҳнатидан 330 очко ҳамда 241,100 доллар ишлаб олди.