"Ролан Гаррос". 17 ёшли Мирра Андрееванинг эртаги 1/2 финалда тугади

Мусобақа кашфиётига айланган россиялик 17 ёшли Мирра Андреева 1/2 финалда ўз юришини тўхтатди. WTA рейтингида 38-ўринни эгаллаб турган Андреева италиялик Жасмине Паолинига деярли қаршиликсиз имкониятни бой бериб қўйди - 3/6, 1/6.

Жасмине бу ғалабаси эвазига финалга чиқиш баробарида теннисчиларнинг ўзаро учрашувларидаги ҳисоб мувозанатини ҳам тиклаб қўйди - 1:1. Етмиш беш дақиқа давом этган баҳсда иккала теннисчи ҳам 1 тадан эйс зарбасини амалга оширган. Паолини 4 та брейк қайд этди. 

Паолинининг бош соврин учун кечадиган финал учрашувидаги рақибаси "Ролан Гаррос" турнирининг амалдаги чемпиони, дунёнинг биринчи ракеткаси, польшалик Ига Свёнтек бўлади.