Ронда Роузи: "ММАга бўлган муҳаббатимни яна топдим"

Америкалик мухлислар яна ўз кумирларини октагонда кўришларига умид қилишлари мумкин. Ўтган ҳафта охирида енгил вазн тоифасида собиқ UFC чемпиони ўғли туғилганидан кейин MMA бўйича машғулотларини давом эттиргани ҳақида гапириб берди.

"Туғруқдан саккиз ҳафта, ММАдан ташқарида саккиз йил, бола туғилгандан саккиз ой ўтгач, бу ишга янги муҳаббат пайдо бўлди. Биринчи видеода мураббий Эй Жей Метюс билан биринчи машғулотим. Мен ҳатти-ҳаракатимдан уялардим, орқага думалаб кетганимдан ўзимни ноқулай ҳис қилардим. Тўғрисини айтсам, чақалоқ туғилгандан сўнг дарҳол зарба бериш орқали шимимни ҳўлламасликка ҳаракат қилардим.

Иккинчи видео кеча олинган. Гилам устида ҳеч қачон ҳозиргидек тез-тез кулмаган ва жилмаймаган эдим. Сўнгги олти ой жуда ажойиб ўтди, ўсиш учун ҳали жуда кўп имкониятларим борлигини ҳис қиляпман. Елкамда бутун дунё юки бўлмаса, энди мени ҳеч нарса тўхтата олмайди", - деб ёзди Роузи видеога берган изоҳида.

Фаолиятининг энг юқори чўққисида Ронда Роузи нафақат UFC чемпиони, балки дунёдаги энг машҳур спортчилардан бири эди. Дзюдо бўйича Олимпия бронза медали совриндори енгил вазнда кетма-кет олтита жангда ғалаба қозониб, 40 сониядан камроқ вақт ичида учта рақибни мағлуб этди ва UFC`нинг асосий юлдузига айланди. Бу муваффақият унга бутун дунёга машҳурлик олиб келди, аммо ММАдаги фаолиятининг эртакнамо финали бўлмади. 2015 йилда Роузи Холли Холмга нокаут билан ютқазиб, чемпионликни йўқотди. Бир йиллик танаффус олган Роузи қайтишини Аманда Нуньесдан қабул қилинган 48 сониялик мағлубият билан "нишонлади".