26 мар 15:46
Янгиликлар

Бокс/ММА

Россиялик UFC жангчиси икки йилга дисквалификация қилинди

Россиялик аралаш яккакураш устаси допинг қоидаларини бузганликда айбдор деб топилган.

Хусейн Асхабов UFC антидопинг сиёсати қоидасини бузгани учун 24 ойга четлатилди. Бу ҳақда Дана Уайт промоушени матбуот хизмати хабар берди. Россиялик жангчи топширган таҳлилларнинг бирида тақиқланган метандиенон моддаси аниқланган. Икки йиллик дисквалификация муддати 2024 йилнинг 28 февралидан кучга кирди.

Маълумот учун, Хусейн Асхабов ММАдаги фаолияти давомида 24 та жанг ўтказиб, 23 ғалаба ва 1 мағлубият қайд этган. Ягона мағлубиятини ўтган йилнинг февраль ойида америкалик Жамал Эммерсдан қабул қилиб олган. Эммерс ҳакамларнинг якдил қарори билан ғалаба қозонганди. Бу россиялик учун UFC`даги дебют жанг бўлганди.