Россиялик UFC маликасига рақиб берилди, жанг санаси ва манзил ҳам маълум

Аёллар ўртасидаги энг енгил вазн тоифаси вакиласи Виктория Дудакова 3 август куни БАА пойтахти Абу-Даби шаҳрида ташкил этиладиган UFC on ABC 7 турнирида навбатдаги жангини ўтказади. Россиялик 25 ёшли аралаш яккакураш устасига шу куни бразилиялик Жаклин Аморим рақиблик қилади.

Мағлубият нималигини билмай келаётган Дудакова ўтган йили UFC промоушенида иккита жанг ўтказиб, ҳар иккисида ҳам ғалаба қозонди. У аввалига Истела Нунесни техник нокаутга учратди, кейин эса Жин Ю Фрейни ҳакамларнинг якдил қарори билан таслим этди. Шу йилнинг март ойида у Мелисса Гаттога қарши октагонга чиқиши керак эди. Аммо Вика жангга бир неча соат қолганида ўзини ёмон ҳис қилди ва шифокорлар тавсияси билан жанг бекор қилинди. 

Бразилиялик 28 ёшли Жаклин Аморим UFC промоушенида 3 та жанг ўтказган. Дебют жангида Сэм Хьюзга очколар ҳисобига кўра имкониятни бой берганди. Кейин эса Монтсеррат Руис ҳамда Кори МакКенни техник нокаутга учрата олди.

Эслатиб ўтамиз, UFC on ABC 7 турнирининг марказий жанги америкалик Кори Сэндхаген ҳамда россиялик Умар Нурмагомедов ўртасида бўлиб ўтади. Ушбу жанг даъвогарлик мақомида бўлиб, ғолиб чемпионлик камари учун мажбурий даъвогарга айланади.