Рустам Ассакалов: "Йигитларим билан фахрланаман"

Ўзбекистон терма жамоаси аъзолари 3 та олтин, 2 та кумуш ва 1 та бронза медалини қўлга киритган ҳолда тарихдаги энг яхши натижани қайд этишди. Терма жамоамиз бош мураббийи Рустам Ассакалов мусобақадан кейин ўз фикрлари билан ўртоқлашди.

"Осиё чемпионати якунларини сарҳисоб қила туриб, бу Ўзбекистон терма жамоасининг муваффақиятли чиқиши эди, деб бемалол айта оламан. Мен йигитларим билан фахрланаман. Барча шоҳсупадан жой олиш учун курашди ва бунга эриша олмаганларга айтмоқчиманки, сиз бошқалардан ёмон эмассиз. Гиламда максимал даражангизни кўрсатишингиз, ғалаба қозонишни хоҳлашингиз керак, гарчи ўзингизни ёмон ҳис қилсангиз ҳам. Ғалабаларнинг асосий жиҳати — бу характер ва ғалаба қозониш истаги! Шундагина даражангиз пастроқ бўлса ҳам, ҳар қандай курашчини енгишингиз мумкин", деб ёзди Ассакалов.

Маълумот ўрнида, Рустам Ассакалов Париж Олимпиадасидаги иштирокидан сўнг юнон-рум кураши бўйича Ўзбекистон терма жамоасига бош мураббий этиб тайинланган эди.