Рустам Ямбулатов: “Мерганлик қонимизда бор”

Бу борада дастлабки қадам пойтахтимиздаги 23-болалар уйидан бошланди.

Мазкур даргоҳ раҳбарияти билан келишувга кўра, у ерда тарбияланаётган ва ўқ отиш спортига қизиққан 25 нафар ўғил-қиз иштирокида дастлабки маҳорат сабоқлари олиб борилди. Унда мураббийлар ёшлар учун мазкур спорт тури ҳақида қизиқарли маълумотларни гапириб беришди. Айтиш мумкин, бу дастур орқали ёшлар ўзлари учун янги Олимпия спорт турини кашф этишди.

Назарий тушунчадан сўнг 9 нафар тарбияланувчи саралаб олинди ва улар иштирокида стенддан отиш йўналишида амалий машғулотлар олиб борилди. Таъкидлаш жоиз, бу каби амалий машғулотлар келаси ҳафтадан мунтазам равишда олиб бориладиган бўлди.

“Республикамизда иқтидорли ёшлар кўп. Фақат уларни саралаб олишимиз керак. Ўқ отиш ва мерганлик, тезкор реакция, нишонни ҳис қилиш ҳисси бизнинг қонимизда бор. Фақат уларни юзага чиқариб олиш лозим”, – деди ўқ отиш бўйича терма жамоа мураббийи Рустам Ямбулатов.