Сабриэль Матиаснинг чемпионлик ҳимоя жанги расман тасдиқланди! Рақиб енгилмас боксчи!

Матиас ўз чемпионлик камарини 15 июнь куни рейтингнинг олтинчи поғонасидан жой олган австралиялик Лиам Паро (24-0, 15 КО)дан ҳимоя қилади. Мағлубият нималигини билмай келаётган Паро 24 та жангининг 15 тасини нокаут билан якунлаган. 

Сабриэль икки ҳафта аввал таниқли промоутер Эдди Хирнга тегишли Matchroom компанияси билан шартнома имзолаган эди. Энди Матиаснинг жанглари DAZN пулли стриминг платформасида трансляция қилинади.

"Ўз ватандошларим кўз ўнгида қийинчилик билан қўлга киритган чемпионлик камаримни ҳимоя қилиш мен учун катта шараф. Ғалабага чанқоқлик аввалги жангимдан кўп бўлса кўпки, кам эмас. Буни ҳамюртларимга ҳам билдириб қўймоқчиман", — деди ўз жангларининг барчасини нокаут билан якунлаган Матиас.

"Мен бу имкониятни бутун умр кутдим. Сабрсизлик билан дивизион қўрқувига айланган рақибимнинг уйидаги жангни кутяпман", — деди Паро. 

Эслатиб ўтамиз, Сабриэль Матиас сўнгги жангида ҳамюртимиз Шоҳжаҳон Эргашевни техник нокаутга учратган эди. Ўша жангда илк мағлубиятини қабул қилиб олган Эргашев бугун панамалик Хуан Хуертасни биринчи раундидаёқ нокаутга учратди.