Сафина Садуллаева бугун "Бриллиант лига"даги иштирокини бошлайди

Нуфузли турнирнинг бугунги куни доирасида ўзбекистонлик Сафина Садуллаева ҳам чиқиш қилади.

Баландликка сакраш дастурида ҳамюртимиздан ташқари амалдаги жаҳон рекордчиси ва Париж-2024 ёзги Олимпия ўйинлари чемпиони, украиналик Ярослава Магучих, шунингдек, Олимпия ўйинларининг 2 карра кумуш медали соҳибаси Никола Олислагерц (Австралия), жаҳон чемпионати совриндорлари Ирина Герашенко (Украина), Элеанор Петтерсон (Австралия) каби номдор спортчилар ҳам медаллар учун кураш олиб боришади.

Мусобақа доирасида баландликка сакраш дастури Тошкент вақти билан соат 21:30 да старт олади.

Эслатиб ўтамиз, Сафина 22 август куни "Бриллиант лига"нинг Лозанна босқичида иштирок этиб, 8 очко қўлга киритган эди. Унинг квалификациядаги жами очколари ҳозирда 9 тани ташкил этмоқда.

Маълумот учун, "Бриллиант лига"нинг финал босқичи 13-14 сентябрь кунлари Бельгиянинг Брюссель шаҳрида бўлиб ўтади.